…..بأسلوبه السهل الممتنع سرد الإعلامي الرائع الطيب عبد الماجد على صفحته بالفيس بوك صراع الإنسانية مع فيروس كورونا
…………….
أخبار سارة عن قاطع الطريق …!!
في الوقت الذي يتربص فيه فيروس ( كورونا ) بالناس في الطرقات والشوارع ويسلب عافيتهم وصحتهم …..!!
ترابط الجيوش البيضاء في المعامل والمختبرات ومراكز البحوث حول العالم ترصد حركته.. وتحلل شخصيته …وتراقب السلوك …حتى يتمكنوا من الوصول الي طرف خيط يوصلهم للجاني ويشل حركة الفيروس الطليق الذي يهدد البشرية …!!
أها الليلة ناس جامعة ( ساوثهامبتون ) في بريطانيا توصلوا الي معلومات في غاية الأهمية …!!
طبعًا الفيروس المحتال دا بغش الجهاز المناعي في الجسم عشان ما يتعرف عليه (( يعني بجي متنكر ))
فبدخل علي الخلية دون ان ترصده الرادارات …..!!
أها الجماعة ديل الليلة عرفو الهدوم البتنكر بيها دي
هي شنو !!!؟؟
لقوها مادة سكرية كدا اسمها ( غيليكان )
شالوها فحصوها لقوها موجوده في فيروسات تانيه زي فيروس ( الأيدز) ( HIV)برضى بجي ملفح بي واحدة زيها …!!
انزعجو شوية ….!!
لأنو لو بقت نفس بتاعة فيروس ( الأيدز ) تبقي مشكلة كبيرة .. ..لأنو الأيدز زاتو ما عندو علاج
ودا كمان طريقة انتقاله أسرع …!!! ودي مشكله أكبر….
لكن في معلم كبير كدا منهم حسم ليك الموضوع دا بمفاجأة سارةً جدا ….
دا لقى إنو المادة السكرية الدارعا ( كورونا ) دي أضعف بكتييييير من بتاعة عمك ( الأيدز …)
الخواجة لما بكون ضحك …!!
ودا الفسر ليهم سرعة الإنتقال والعدوي بتاعة ( كورونا ) في إنو بهجم وبهرب لي شخص اخر وينقل العدوي …!! ( عارف نفسو قاعد ساي الجبان )
عشان كدا فيروس ( الأيدز ) لأنو مدرع كويس بالمادة دي …فما بنتقل بالسرعة دي من لطف الله علينا ….!! يعني إلا تكوسو إنت براك…!!
لكن دا
ياهو قااااعد متكل في الشارع كدا راجيك …( رباطي بس )
ودا طبعًا أكبر تطور حصل حتي الآن في الكشف عن شخصية كورونا …
و أهمية الكلام دا إنو بمجرد ما عرفو إنو المادة البغلف بيها نفسو دي ضعيفة كدا …معناها مافي أي عائق أمام الجهاز المناعي في هزيمته من خلال الأجسام المضادة …ودا الشغالين عليه الان ….
( شوف العلم دا سمح كيف ) …!!
غايتو طالما لقو فيك نقطة ضعف الجماعة ديل أرجى الراجيك بس …
جابت ليها سكر كمان …
إن شاءالله قريبا خشمك حيبقى ملح ملح
وبمشيئة الله وأمره…….!!! ستعبر البشرية
كورونا في طريقة إلى ( الفتيل ) …!!!