رحم الله الشيخ محمد احمد حسن الذي دخل قلوب كل السودانيين ولم يعرفه احد الا وفتح له قلبه …..كانت وفاته موسما للحزن فصار الجميع يحاول استجماع اللحظات التي جمعته بالراحل
رصد محرر المجرة هذه المادة اللطيفة وأراد أن يشرك بها قراء المجرة وان تكون صدقة جارية لشيخنا الراحل …….
يقول احد الطلاب على صفحته بالفيس بوك
………..
من روائع الشيخ محمد أحمد حسن رحمه الله تعالى :
كانت عندنا محاضرة في فقه العبادات (الطهارة والصلاة) بجامعة أمدرمان الأهلية وكانت المتحدث هو شيخ محمد أحمد حسن وبعد نهاية المحاضرة فُتح باب الأسئلة فدخل أحد الطلاب وقال:
طبعاً يا شيخنا نحن هنا معانا زميلاتنا وبقوا زي أخواتنا وبنسلم عليهم في يدهم وبالكتير تخت يدك في كتفها أثناء المصافحة وفي ناس شابكننا المصافحة حرام المصافحة حرام فما رأيك؟
رد الشيخ:
يا سلاااام ولدنا دا سأل سؤال مهم شديد.
أولاً يا ولدي زميلتك ماهي زي أختك وربنا يعرس ليكم من بعض إن شاء الله.
تاني يا ولدي مسألة المصافحة فيها أقوال مختلفة لكن أخفها عند بعض المالكية إنو المراة تخت قطعة من توبها أو خمارها وتصافح.
ونحن ما بندعوكم للتشدد فيعني لو المصافحة بقت باليد من بعيد أحسن ولو كاففتها على تباعد لا بأس لكن مسألة تخت يدك على الكتف دي ما بتبقى فالمنطقة دي كهربتها عالية وانتو شباب كهربتكم عاااالية وفي الحالة دي بتعملو تتش والتتش بعمل حريق وبتكونوا وقعتوا في المحظور.
وينفجر الحضور بالضحك على إختلافهم.
بالله عليكم في فن دعوة أرقى من كدا؟
رحمك الله شيخنا الجليل. ( منقول)