نشرت فتاة سودانية استشارة على مواقع التواصل الاجتماعي عكست فيها مشكلتها مع حد الشباب الذي كانت برفقته .
وحسب متابعات موقع المجرة برس فقد ارادت الفتاة راي المتابعين في مشكلتها مع ذاك الشخص التي قررت تركه بعد رافته لفترة وقالت الفتاة :(انا طالبه جامعية يوم راكبه المواصلات قعد جنبي شاب لما الكمساري طقطق طلع محفظته ودفعي لي انا رفضته بس هو اصررر يدفع لي وبقي يسالني انتي بتقري وين وساكنه وين وقبل ما ينزل شال رقم تلفوني بعد ساعه جاتني مكالمة رديت صوت راجل سالتو مين انت قال قلي انا فلان وسالني وصلتي كيف بقينا متواصلين صراح هو شيين شديد بس ظريف ولسانو حلو بقي يتصل علي ويعزمني في اماكن عامه بتذكر اول هديه جابا لي تلفون كان صادف عيد ميلادي
و بعد تلاته شهور من تواصلنا فاتحني في موضوع الزواج قال لي انا عاوز اتزوجك صراحه فاجنى بي موضوع الزواج ده قلته ليه خليني افكر قال لي اخدي راحتك فكرته فيه صفاته واخلاق اول شئ انسان ظريف ووناس شدييد وما قاعد يزعلني وكريم ما بعدي شهر الا يجيب لي هديه وبعزمني في اماكن حلوه اها يوم عزمني واثنا ما بنتونس سالني اها ما رديتي علي في موضوع الزواج فكرته كده في لحظه قلته ليه موافقه لكن بعد اخلص الجامعة وانا كان باقي لي زي سنه ونص كده اخلص الجامعه قال لي موافق وبقين متواصلين تلفونات وعزومات ورحله وهدايا بعد سنه قلت هوي يا بيت الزول ده جادي وشابك فيك شبكه جد لاذم اتتخارجي منو بس كيف زعل ما قاعد يزعلني ومافي سبب يخليني اعمل معاه مشكله عشان اتخارج منو في الاخر قررت اقفل شريحتي والزمن كان مناسب كنا في اجازه يعني ما حا يجيني في الجامعة وفي الكم شهر ديل يكون قنع مني ونساني خلاص طلعته الشريحة من التلفو واشتريت شريحة جديدة وعملته نايمه عدي شهر بي حالو قلته يابت خلاص الزول ده نساك يوم بعد المغرب مشيت الدكان عشان احول رصيد حولت الرصيد وجيت طالعه من الدكان اشوف ليك زولي واقف تحت العمود الجنب الدكان وماسك ليه قارورت بارد وبشرب وبعاين لي انا جايه لما شوفتو ما عارفه كيف اوصف ليكم حالتي بس حسيت في كرعي بقو مافي كاني واقفه في الجو بدون عرعين قدر ما حاولته احرك كرعي احس اني بدون كرعين وبقيت منططه عيوني وبعاين فيه وعرقي نازل تقول صابه في مطر وهو بشرب في البارد ويعاين لي بعد خلص البارد جاء علي وقال لي بكرة الساعة كذا لو ما قابلتيني في الكفتيرياء الفلانيه اتاكدي بكرة زي الزمن ده بتلقيني قاعد مع ابوك ومشي خلاني في حالتي ديك قايتو بعد مسافه بديت اشعر بي كرعي بدو يرجعو لي جرجرت كرعي يا الله وصلت البيت وحمي جسمي بقي مكوه بس وبرد لما برجف واسناني بطقطق امي لما اتخلعت مالك يابت قلت ليها قطيني بالبطانيه هبشت جسمي لقتو مولع نار قالت لي امشي اجيب ركشه واتصل لي ابوك يحصلنا في اامستشفي قلته ليها لا بس قطيمي بالبطانيه جابو البطاطين كلها ردموها في وانا لسه برجف وسنوني عاوزه تتكسر امي جابت حبتين بندول وقالت لي ابلعيهم ابو يتبلعو لي بلعتهم يا الله بعد نص ساعه نومته تاني ما صحيت الا اذان الصبح امي حست بي لما قمته من السرير قامت قالت لي اها هسي كيف قلته ليها كويس دخلته الحمام كبيت لي مويه في جسمي وجيت صليت وبقيت قاعده افكر اطلع من والورطه دي كيف
المهم بعد الفطور اتحججته لي امي اني لاذم اطع عشان وعدت صاحبتي نمشي لزميلتنا كانت عيانه امي رفضت في البدايه قالت لي انتي امبارح كنتي عاوزه تموتي الليله تطلعي المهم اقنعت امي وطلعته مشيت قابلتو طلع لي فواتير كل حاجه جابا لي من التلفون لحدي اخر هديه ومصور كل هديه جابا لي وكل ما يعزمني اذا المطعم في نظام ورق بطلع من المكنه (اوردر )محتفظ بكل ورق الاوردرات وحتي المطاعم والكفتريات الاكلنا فيها وما فيها النظام ده مسجل كل شي في الدفتر طبعا انا عيوني ضلمت وبقيت ما بشوف لما
اها كان لما يجيب لي هديه كنت بقول لناس البيت موفره من مصروف الجامعه لما يعزمي وناكل برا بقول لناس البيت ما جعانه او مشينا لصاحبتتا زيارة عيانه واتغدينا معاها او اتحجج بي اي شى
اها قلت ليه خلاص انا برجع ليك الهدايه في جزء كبير منها محتفظه بيه والحجات الما محتفظه بيها بقسط ليك تمنه قال لي مافي كلام زي ده عندك خيارين يا ننفذ اتفاقنا للاخر بعد اسبوع اجي اعقد وبعد تخلصي الجامعه نتم الزواج يا بكرة حا اجي لي ابوك معاي الكراس والفواتير والصور واحكي ليه كل شئ
انا ما خايفه من ابوي يضربني او يكسر عضامي خايف من ابوي يحصل ليه شئ ابوي انسان مكافح وزول رسمي وليه كلمة كان في الاسرة او وسط اهلنا عامة كلمتة مسموعه
عليكم الله اعتبروني بنتكم شوفو لي حل لي مشكلتي دي او انصحوني اطلع منها كيف واصلح غلطي
وان شاء الله ما تشوفو شر في بناتكم).
ولكن رواد مواقع التواصل انهالوا عليها بالتعليقات السالبة والبعض نصحها بالتحدث مع والدها قبل ان ياتي الشاب ويخبره.