*سمية ابو كشوة :نلت الدكتوراة الأكاديمية من جامعة اوتاوا وسحب الدكتوراة الفخرية لم ينقص مني شيئا. – يا دكتورة ابردي ، هو ما نقص منك شي بس نقص من الشعب السوداني ومن قيمة جامعاته، وبعدين مجلس الاساتذة قال بس انه انت ما مستوفية لشروط نيل الدرجة دي فقام سحبها منك ومن بقية الشلة الزمااان ديك لو متذكراها.
*الجبهة الثورية: مفاوضات السلام الجارية ستتمخض عن سلام شامل في القريب العاجل. – ستتمخض ؟ستتمخض؟ تتمخض كيف وهي جارية . غايتو لحدي ما تقيف ح نتمخض نحنا
*الصاغة وتجار الذهب يهددون بالدخول في اضراب .
– يا للمصيبة، تاني حتي الدهب بالصف.
*القوات المشتركة تضبط كميات كبيرة من البنقو بمنطقة فوربرنقا بولاية غرب دارفور. – غايتو البتاع ده الوحيد المنضبط في البلد دي.
*جزمت مصادر بعدم عقد أيّ اجتماعٍ بين افراد النظظام المخلوع بسجن كوبر، وقالت الصحيفة إنّ هذا أمر ممنوع تمامًا ولم يحدث على الإطلاق. و أنّه لا صحة لأيّة لقاءاتٍ أو تبادل حديث منظم بين المعتقلين باعتباره أمرًا مخالفًا للوائح السجن. وأوضحت أنّ قادة النظام البائد مقسمون إلى قسمين، وكل قسم يحتوي على غرف حبس انفرادي، أمّا القسم الثالث فهو قسم حديث يحتوي المعتقلين المتورّطين في قضية”خط هيثرو”. – غايتو بالنفي ده، كدة يا دووب الفار بدأ يلعب في عِبَّنا. وبعدين جزمت دي يعني قالت علي الجزيمة.
*قالت لجنة الحريات الدينية في الولايات المتحدة الأميركية إنها تجري مناقشات مع المسؤولين في السودان لحذف مادة الردة من القانون الجنائي وإنها تراقب الممارسات الفعلية للحكومة الانتقالية بشأن الحريات في البلاد. – كدي الغوا مادة الجوع و” الصفوف” أول ، الردة ملحوقة بالاستتابة.
*كشف تجار عملة بالسوق السوداء عن اختفاء الدولار، وأرجع أحدهم السبب إلى ظهور مجموعة كبيرة تستغل سيارات مظللة”بكاسي دبل كاب”، قال إنّها اشترت الدولار بثمنٍ باهظ، واختفوا للتو من وسط الخرطوم أمس”الخميس” – عقبال ما تختفوا انتو ذاتكم والبكاسي الدبل كاب والسينقل كاب المظللة والما مظللة ، قاددر يا كريم.
*أشاد خبراء ومراقبون بتصريحات الفريق أول محمد حمدان دقلو النائب الأول لرئيس مجلس السيادة عن معاناة الشعب السوداني من الازمة الاقتصادية الطاحنة التي يعانيها السودان وتصريحات الأستاذ عمرالدقير بفشل الحكومة الانتقالية في حل الازمة . – غايتو لقب خبير ده بقي اكتر من الدكتوراة الفخرية ايام الانقاذ . طيب طالما عندنا كمية من الخبراء اكتر من الازمات ، ليه وضعنا مطين كدة؟ يكون عشان قاعدين يراقبوا بس ؟ ولا عشان مجال الخبرة ما بسمح بغير المراقبة ، غايتو قرييب ح نسمع عن اضراب الخبراء والمراقبين عن الخبرة والمراقبة وغالبا الشعب ح يقيف صفوف عشان ينال نصيبه من المراقبة. بالمناسبة هم براقبو في شنو؟
*أعلن وكيل وزارة الثروة الحيوانية والسمكية عادل فرح عن إنشاء مسلخ فى منطقة الجنيد بولاية الجزيرة بطاقة استيعابية كبيره لتصدير اللحوم إلى أوربا. ووصول المعدات والأجهزة الخاصة بالمسلخ التى يتم تركيبها حاليا بواسطة استشاري فرنسي الماني وروسي لوضع مواصفات قياسية لتصدير اللحوم لاوربا. – يعني من زمان بتسلخو فينا كيري ساي ؟ ان شاء الله يجيب مريسة تام زين.
الدقير يواجه هجوما كاسحا بعد انتقاداته لحكومة الثورة، ارجع الكثيرين هذه الانتقادات لفشل مساعي الاتيان به نائبا لحمدوك. – يا الدقير ثبت الارتكازات والباكات ما يتقدمو كتير لانه العكسيات خطيرة علي دفاعك والقون في المرحلة دي ما بتدرن واتذكر انه الهدف العكسي مدمر وبعدين ياخ دي ما كانت شبكتك انت!
