نطالب باطلاق سراح رموز النظام البائد خوفا عليهم من الكورونا، مش فى مساجين قبال كده فكيتوهم من السجون؟ ، طيب خلاص هم كمان برضو فكوهم، فكوهم عشان ينضموا لاخوانهم القابضين على مفاصل الدولة اقتصادا وأمنا واعلاما ووظائفا، فكوهم عليكم الله عشان نقتنع انو الكيزان هم الحاكمين الحقيقين للبلد دى حتى الان وننسى حاجة اسمها ثورة وشهداء واعتصاَم، فكوهم وخلوهم ينضموا لانس عمر الذى يقود المظاهرات ويحيك الَمؤامرات ويدبر الاغتيالات وسايط البلد دى شمال ويمين، فوق وتحت ومافى زول قادر يقول ليهو تلت التلاتة كم، فكوهم عليكم الله عشان ينضموا لناس الطيب مصطفى وحسين خوجلى واسحاق احَمد فضل الله فى الإعلام المرئ والمقروء والمسموع والميطى بثا للسموم تشكيكا وتلفيقا وتكذيبا وتقذيما للثورة ورموزها وشهدائها وَمافى زول قادر يقول ليهم نص السبعة كم، فكوهم وخلوهم يكملوا الناقصة مع اصحابهم العساكر فى المجلس السيادى ناس صلاح عبد الخالق الذى لوث الاعلام استفزازا وتحديا واستحقارا للثورة والثوار فى وضح النهار ومافى زول قادر يقول ليهو طظ، فكوهم عشان يديروا اعمالهم وفسادهم واستثماراتهم بانفسهم بدل ما يديروها ليهم ناس بالوكالة، فكوهم عليكم الله عشان ينضموا لاصحابهم اصحاب المخابز الذين تحدوا وزير التجارة والصناعة وتحدوا مواعيدو ومؤتمراتو وكمبيترو وارقامو وفصاحة سكرتيرتو منى قرشى، واليوم انا اشتريت العيشة الواحدة بجنيهين على عينك يا وزير، فكوهم عشان ينضموا لاصحابهم اصحاب البصات السفرية الذين تسلطوا فى قطع ارحام الناس بمضاعفة اسعار التذاكر عشرة مرات، حيث بلغت تكلفة التذكرة الواحدة للابيض الفين جنيه وللفاشر ستة الاف جنيه ومافى زول قادر يحاسبهم، فكوهم وخلوهم ينضموا لاصحابهم فى القوات النظامية الواقعين فى الناس خبت، طلاب واساتذة، مزارعين ورعاة، أطباء وقضاة ومافى زول قادر يوقفهم فى حدهم ، فكوهم وخلوهم ينضموا لناسهم الشغالين تفكيك فى لجنة التفكيك ذاتها شخصيا، وناس حكومتنا الموقرة سادين دى بعجينة ودى بطينة، فكوهم وخلوهم يمشوا لاصحابهم فى الصين عشان يتبرعوا ليهم بكورونا ويشيلوهوا ويجوا يفكوا فينا عشان يعدمنا نفاخ النار، ان شاء الله ما قمنا منها، هو عليك الله العايشين ليها شنو لمن نكون عاجزين نقتص من السفاحين مصاصى دماء الشهداء وعاجزين نعيد المفقودين وعاجزين ناخد حق المغتصبين والمجدعين فى النيل، فكوهم ونحن من جانبنا نتعهد ليكم بانو ما حنسال عن نتائج تحقيق لجنة تمرد القوات الامنية ولا عن نتائج لجنة نبيل اديب بتاعة فض الاعتصام، ولا عن نتائج لجنة محاولة اغتيال رئيس الوزراء عبد الله حمدوك، ولا عن مواعيد تشكيل الولاة ولا عن مواعيد تشكيل المجلس التشريعى.
فكوهم من السجون وفكونا نحن فى البحر عليكم الله عشان نرتاح من الهم والغم والعبط دا.
