( اذانة خلط وا تفطروا)
في مدينة من مدن السودان الجميلات و كان الزمن رمضان؛ الناس بقولوا رمضان احلى في السودان لكن رمضان احلى في الريف؛ ياخي الحلال ديل زمان فيهن حلاة صيام؛ الحلة مهما يكون كبرها شنو بتلقاها كلها ثلاثة ولا اربعة ضريات؛ ياخي داك زمن (صينة الطلس) و الكور الكبار الكاتبين فيهن رمضان كريم؛
لا حولا ولا قوة الا بالله العلي العظيم؛ بالله انت يا ملاح الدين من زمن (الكورة ام قعر؟)
ايوا والله انا من زمن ناس الضراء بفرشوا بروش بدل السباتات و زمن ( الركوة)؛ ياخي الركوة دا ابريق مصنوع من الحديد و دا كان قبال اكتشاف البلاستيك؛ و الغريبة انحنا من قمنا لقينا ابهاتنا ديل اي واحد ابريقه واحد، لا قِدم ولا انقدا؛ ولا اتكسر؛ ياخي ناس زمان معيارهم في اختيار الاشياء الجودة و المتانة؛ فعليكم الله شوفوا عربات زمان ديل شغالات كم سنة؟
السنفجات
التوامس
الاواتسن
النيسانات
البكاسي
و هسه ناس
البي واي دي
و الكيلك
و الاتوس
و التوسان
و الخرابات ديل كلامكم بعيشن زي حديد زمان داك؟
ياخي كل الضراء زمان بتلقى اي صينية لو بالغت فيها اربعة او خمسة اصناف (عصيدة و ابريه و كركدي و لويبيا و ام جنقر) ؛ و بتلقى المويات مطعمات نص كم و لكن بتلقى ناس الضراء فرحانين و بشوشين راضين بما قسم الله لهم رزق لا يمدون يدهم لغيرهم ولا يعشمون في حق ما حقهم ؛ و المحيرني جدا على الرغم من ان فطور اهل القرى ما فيه اي حاجات اضافية لكنهم بتلقى اغلبهم شغال اعمال شاقة طوال نهار رمضان؛ فمنهم :
المزارع
و الراعي
و بتاع كمينة الطوب
و سيد كمينة الفحم؛
و كل هذه الاشغال محتاجة لمجهود عضلي و الذي لا يتوفر الا بالغذاء الجيد؛ و لكن دا فرق الاكل الحلال حيث ربنا طارح فيه البركة؛ فنادر ما تسمع ليك بزول عيان ساكت ؛ مستغرب جدا في ناس القرى ديل كانوا بفطروا باي توقيت! لاننا بنجوا و بنقدوا مقنبرين كداااا حتي نسموا النقارة تدق؛ نقارة شنو يا ملاح الدين؟
الزمن داك لا في كهرباء ولا حاجتين فعشان يسمعوا الحلة كلها لازم يدقوا ليها نقارة؛ يوم واحد مافي نقارة دقت قبل المواعيد زي اذان مدينتنا الجميلة ديك؛ ياخي الاذان دا ما عارفه اليوم داك مالو؟ جاء قبال الزمن بربع ساعة و نفخ ليك المكرفون اوف اوف اوف و طوالي خشى ليك اذانة نجيضة؛ يا الله يا الله واحد من ناس السوق القريبين من الجاَمع حصله؛ اها عشان يتدارك الناس طوالي قال ليهم بالمكرفون : ( يا ناس اذانة دي خلط الناس وا تفطر )؛ هسه عليكم الله اذان المدينة دي مش احسن من تلفزيون السودان؟
ياخي معقول التلفزيون يأذن قبال عشرة دقائق و كل الناس الشغالين في التفزيون ديل واحد يشوف ساعته مافي؟
ياخي حيرني مدير التلفزيون القال فطر باذان التلفزيون الغلط! يا عمك انت تقول لينا اذانة دي خلط وا تفطروا؟ ولا تقرقع قبالنا؟ غايتو كن عندي عليكم سلطة ببتدي منك انت يا السيد المدير لانك حقو تكون متقدم ليهم ما تابعهم؛ و حقو تكون متابع في ساعتك زمن و مواعيد البرامج و تكون الخارطة البرامجية في يدك؛ هوي يا ملاح الدين انت بتتكلم عن شنو؟ كلامك دا يكون ديدن لمن تكون البلد ماشة صاح و لديها خطة واضحة؛ و لكن من زمن الدفاع بالنظر البلد دا سايبة سااااااكت؛ فعادي يومي تسمع اذانة خلط؛
نسال الله يلهمنا الطريق البخرجنا من تخبطنا هذا
خالص ودي
المجرة برس