ملاحات …..ملاح الجبوري….بندقية دقاها حدادي وزرع مقطاع الوادي ومرة وليها قاضي ….اقيف منهن غادي

ملاحات (427)
ملاح محمد بشير الجبوري
123102717. 912247358

بندقية دقاها حدادي؛
و زرع مقطاع الوادي؛
و مراة وليها قاضي؛
كلهن اقيف منهن غادي؛
زمان كان السلاح دا نادر؛ و الشرطة و الجيش كانوا مسلحين بابو عشرة؛ و ابو عشرة دا من عينة البنادق الما اتومتكية فهو بيعمل يدوي و دونه ابو خمسة و كلاهما بيضرب من مسافات بعيدة و بي نيشان محكم؛ و كان عينة هذه الاسلحة ما موجودة الا عند الحكومة؛ و قليل من الهمباتة في الصحراء؛ و بعض التجار المصرحنها من الحكومة؛ لحدي قريب دا بتلقى ليك كم حلة و كم مدينة ما فيها اي بندقية خلاف بندقية صناعة محلية زي ( الخرطوش و المرمطون و القريبينة)؛ و طبعا ديل ما عندهن امان ولا نيشان؛ عادي ممكن توجهها شرق تضرب ليك غرب؛
و تكون منشن فوق تضرب تحت؛
و مرات كثيرة بتكضم ما بتقوم؛
و في بعض الاحايين بترجع خلف في الضرابها بتطلع سفته؛
عشان كدة لمن تحصل دوسة و الناس ينشبكوا ما بكون الاعتماد علي السلاح المحلي لانه ممكن يخزلك؛ فبكون الاعتماد دائما علي السلاح الابيض؛ و الجماعة بلموها كباشية فاسي و فرارك؛
و كوكابي و حربتك؛
و عكازتي و قرجتك؛
غافل جافل بتسمع كو في نايطك تتلفت تلقاه سفروق جاي من بعيد؛ ياخي الناس يداوسوا يومين يقولوا ليك الجرحى عشرة و ميت زول واحد؛ توا دا الناس سبيب صغيير تسمع الزخيرة دي بتوسي شوووووو لمن تجي الحكومة تكبس بقولوا ليك الميتين ميات و الحرجى ما محصيين و في مفقودين؛ انتو السلاح دا اتسرب لايدي المواطنين ديل كيف؟ معقول الحكومة دي ما قادرة تلم السلاح دا من الناس و تخلينا في سلاح الحدادي الما قاطع فرقة داك؟
الزراعة عندنا زمان دي الخدمة الوحيدة و المقدسة؛ و لو انت زول صبي او قادر على الزراعة و الناس بمشوا الزراعة و انت مقيل في الحلة؛ المجتمع بصنفك زول ما نافع مهما تكون ناجح في بقية الحاجات؛ فمن المهم جدا انو زرعك يكون قريب و سهل الوصول اليه؛ فلو بعيد لازم فترة الحشاشة ترحل فيه؛ و ما يكون بغادي للوادي عشان ما تنقطع اخبارك و يحصل عليك شي و الناس ما تلقى خبرك،
و المراة لمن وليها يكون حاكم او مسؤل مهما يكون عدله فهو بنحاز ليها زي حكاية عسكري الدورية الوقف البنات و في النهاية طلعوه غلطان؛ حقو الناس تكون امام القانون سواء ما تتكرر التجربة السابقة؛ زمان لمن كتبت و انتقدت النظام السابق صنفوني شويعي؛ هسه كم مرة بصنفوني فيها باني مندس و كتائب ظل؛ يعني لا الشويعية رضيانين علي ولا الاسلامين قبلانين بي؛ لكن انا رضيان كل الرضا على نفسي؛ و بكتب الكلام البشوفه ممكن يخدم المصلحة العامة و يقدم البلد؛ ما هاميني تصنيف الناس لي لاني ما مقتنع باي حزب و شايف كل الاحزاب دي دون طموحي و اقل من مستوى تفكيري؛
الحل ما في البل؛ الحل في عمليات مكثفة لجمع السلاح من ايدي المواطنين و فرض هيبة الدولة بالقانون حتي نرجع نحن للسلاح الابيض؛
الحل في تقديم خدمات في اماكن الانتاج و ربطها باماكن الاستهلاك عشان يسهل التسويق، ياخي الليلة الكرتونة الفاضية في ابو جبيهة اغلى من كمية المانجو مقدار الكرتونة؛
لشنو؟
عشان مافي ترحيل و مافي مصانع قايمة في محلات الانتاج؛
اكعب جاحة عدم العدالة في الحكم و الشعب دا ما مرقوا جوع؛ بل مرقوا الظلم و سيادة الطبقات و الفوارق البقت واضحة بين ناس قادرين يعملوا اي شي و ناس ما قادرين يعملوا ولا شي؛ فلو انتو دايرين تمشوا في درب ديلك حتفوتوا بنفس السيناريو؛
عشان دا كلو ما يحصل تعالوا كلنا يكون همنا الاول و الاخير هو الوطن و حتما سنعبر
نسال الله لي و لكم العافية
خالص ودي
ملاح محمد بشير الجبوري
molaha1976@gmail.com
ابو زبد مايو 2020