ملاحات (430)
ملاح محمد بشير الجبوري
123102717. 912247358
يا جماعة ترا في المنشورين السابقين نسيت اعيد عليكم مع زنقة رمضان، غايتو السنة دي بس ربنا يعظم الاجر؛ هههههههههههاي حكاية تعظيم الاجر دي ذكرني اجر الموظفين اي المرتب؛ مافي سنة المرتبات دي اتعظمت زي تعظيمها دا؛ لكن كمان زي ما اتوقعت الاسعار عملت تعظيم سلام؛ ياخي الشغل الامس كان بعشرة بقي بمية؛ انتو يا جماعة عُملتنا شنو؟
مش الجنيه؟
طيب الجنيه دا لونه شنو و شكله كيف؟ معقول يكون عندنا عملة اسمية ساكت؟ مافي عملة ما فيها أجزاء؛ يعني الدولار عنده اقسام داخلية و متداولة و بتجيب حاجة؛
و الريال و الدينار كذلك؛
طيب انحنا جنيهنا دا أجزاءه شنو؟ مش القرش و المليم؟
هسه في جيل كامل لا شاف القرش ولا سمع بالمليم،
ياخي ما نسرح مع الاقتصاد و الاوضاع الما مفهومة دي و ننسى معايدتكم؛
عيد مبروك عليكم
عيد الحول ما يغضب زول؛
عيد السنة ما يغضب جنة؛
ان شاء الله زايدين مانا ناقصين؛
معيدين في جبال عرفات،
انتو بمناسبة عرفات دي؛ السنة في حج ولا مافي؟
ياخي الكورونا دي دخلت ليك العالم دا في حتة ضيقة؛ و قريب دا مافي سنة عدت بدون حج؛ هي ذاتها سنة عشرين عشرين دي سنة عجيبة و غريبة؛ ياخي دي السنة الوحيدة الدخلت ليك رئيس امريكا في فتيل؛ من ما قمنا ما شفنا مظاهرات في أمريكا بهذا الشكل! اعمال شغب و تخريب من أرقى شعوب العالم؛ انا عندي احساس انو خارطة العالم دي دايرة تتغير؛ ياخي من الامريكان انتخبوا ترامب ابو رويس ذي الدليبة الممصوصة دا؛ انا قنعت من خير فيها؛ و العجب شويفع كوريا البيحلق تربيعة داك ؛!!!
هسه وليد كوريا دا حلاقه منو؟
هسه الحلاق دا لو قاعد يحلق فيه و جرحه بالموس مش دا بعتبره عمل ارهابي و محاولة لتغويض نظامه؟؟؟ ياخي لمن تلقى ليك حكام بدون فهم زي ديل اتخيل اي شي يمكن يحصل؛ دقليمة خاشقجي دقيلة دقيلة دي عادي ممكن تكون مع اي زول؛ انت يا ملاح خليك من العالم و كورونته شوف البحصل في البلد دي شنو؟
الشرق مسخن؛
و اي حاجة من مصر متوقعة؛
و الحركات شايفها قاعدة تعمل حركة بحركتين؛
و حالات الكورونا في تزايد مع انو الخبراء الصينين قالوا حالاتنا دي ضاربة ساكت و اجهزتنا زاتها ما دقيقة؛ بقيت اصدق حكاية الزول الشخصو له هنا انو يوجد في صدره حشرة و لمن سافر برة الدكاترة قالوا له الحشرة في الجهاز الكشفوا ليك به ما في صدرك!! هسه في ناس كثاااااااااار معناتو اتكورنوا سااااااكت؛ غايتو دا اول اعيد اعيده بدون صلاة و لفليف فكن حينا كثير اكيد بنشوف كثير، ربنا يرفع الكورونا و يحقن دماءنا البقت بتسيل لاتفه الاسباب،
خالص ودي
ملاح محمد بشير الجبوري
molaha1976@gmail.com
ابوزبد يونيو 2020