ملاحات (431)
ملاح محمد بشير الجبوري
123102717. 912247358
زمان في زول مع ولده عندهم بهيمة راحت فمرقوا يفتشوا فيها، و في مشيتهم دي زي طولوا و تعبوا حااااار و الجوع طلع عينهم لان زوادتهم نفدت؛ و طبعاً زمان لمن تكون مارق لمهمة اهم حاجة يكون عندك زوادة، ياخي نسوان زمان ديلك بعرفن لعمل الزوادة جنس عرفة؛ عادي الجدادة دي يكرفسوها ليك بتتم كمكمين يوم، و العجب البوسيك و الخميس طويرة؛ ياخي انحنا ديل لمن كنا طلاب في المدارس بدونا البوسيك دا بقضي معانا طيلة ايام الفصل الدراسي لا بخمر ولا مدة صلاحيته بتنتهي؛ بنات هسه ديل في المناسبة تلقاهم متركشات اغاطي الحلل و كن قلت تغطيها كويس بقولن ليك خليها الوطاة سخنة كن قفلتها بتضرب؛ ههههاي انتي قدرتي لي وجهك ضربتيه لمن حلة الملاح ما تضرب؟
اها زولنا دا و ولده طبعا قطعوا زوادة فترة طويلة و ما لقوا ليهم حاجة يلوكوها و خلاص الجوع ملكهم و طلع سفتهم ؛ و على العليهم صبت فيهم مطرة تمت المقصر ؛ ياخي هم ماشين تويانين كدة لمن مرقوا ليهم في غزالة ميتة ضاربيها صاقعة؛ فالابو دا شاف لولده كدااا و قال له : ( يا فلان الغزالة دي فطيسة و هنا الا انا و انت؛ مافي زول شايفنا فارح نلموا لينا هشيم نوقدوا لينا نار نالكوا لينا لحم و خشمك و عندك)؛ دقيقتين بس الجماعة ديل تنبلوا نار زي الولعوها الكفار لسيدنا ابراهيم؛ و سلخوا ليك الغزالة و ظبطوها مناصيص و اتملوا شية لمن بقوا فُطُح؛ و بعد داك قاموا راجعين؛ و لمن قربوا لحلتهم الاب قال لولده ( لو جبت لناس الحلة ديل سيرة الغزالة الفطيسة دي انا بطلع عينك) فلمن وصلوا و ادوهم موية؛ الولد شرب موية كثيييييييرة و بعد ما خطى الكاس قال : (بالله شوفوا الداهية ام قرينات دي سقتنا موية كيف؟) فقام ابوه جرا فيه نور طووووووويل فالتفت الولد للناس و قال ليهم: ( في زمتكم دي انا هسه قلت ليكم : انا و ابوي دا اكلنا غزالة فطيسة؟) هسه انت كمان لا في زول سالك؛ ولا في زول جاب طاريك؛ براك تحظر نفسك و تقول انا خالطت هناية ديك المسكتها كورونا؟ يا عمك قالوا ليك الكورونا دي ما بتتنقل بالسلام ولا بالجلوس جنب بعض؛ الا بالرزاز الطالع عن طريق العطس او اللعاب او المقالدة؛
طيب انت ما عارف المخالطة يعني شنو؟
فلو ما عارفها دي كارثة؛ و لو عارفها و طبقتها بمفهومها داك ديل كوارث؛ غايتو كن اتكلمنا بقولوا كتايب ظل و كن سكتنا شوف جنس الحاجات ديل،؛ ياخي يا عمك ما تبقى سياسي زي الولد لمن قال الداهية ام قرينات؛ و تقول: جاني زول مشتبه؛ ولا حممت لي جنازة و لاحقا تاكد خبر الوفاة كورونا، كدة ممكن تنبلع لينا! لكن خالطت لي واحدة دي ما وقعت لي؛ كدي انت خالطتها ولا خلطتها؟
غايتو الكورونا دي زي ما سترت عيوب؛ برضها مرقت عيوب؛ نسال الله ان يرفع الوباء و يشفى المرضى و يرحم الموتى يا رب نصبح على سودان معافى يضمنا كلنا.خالص ودي
ملاح محمد بشير الجبوري
molaha1976@gmail.com
ابوزبد يونيو 2020