ملاحات (436)
ملاح محمد بشير الجبوري
123102717. 912247358
امتحانات الاساس حدودها؛ كدي يا ناس انتو التلاميذ ديل قروا شنو عشان يمتحنوهم؟
هسه كليماتي الشويات ديل انا متاكد في ناس حدودني طوالي اني معارض للنظام دا و داير اعبي الناس ليوم ثلاثين و كدة، بالمناسبة مافي مظاهرات ولا مسيرات بتغير حالنا دا، الحال دا محتاج لتفاكر و رضاء بالاخر و تنازلات، انتو وين ناس العقول النيرة و الفهم الراقي؟ شغالين بنفس خرمجة ما قبل السقوط و دايرين نتائج مختلفة؟
في زول بعمل تجربة و بجي بعيدها تاني بنفس المعطيات السابقة و بنتظر نتيجة مخالفة للنتيجة الأولى ؟ ناس الانقاذ زمان لو جيت داير تنصحهم بقولوا دا شويعي،
و هسه نفس الشغلة؛ مجرد ما تفتح خشمك بقولوا عليك نظام بائد و كتائب ظل و كدة؛ و الغريبة انا سمعتهن الاثين: يعني ديل مصنفتي كوز؛
و ديلك مصنفني شويعي؛ و ما شغال بيهم لاني بكتب الكلام البمليه علي ضميري و بحس انه بخدم وطني؛ ممكن لمن كنت اصغر من كدة اكون تابع لكيان معين؛ لكني الان لقيت كل الكيانات دي كضاااااااابة،
عارفكم مع كضابة دي عملتم ترررررم؛ و دا حالكم؛ اصلكم شعب جميل و فرايحي في عز الزنقة بعمل زنقات؛ ياخي في الوضع الفينا دا :
غلاء طاحن
مواصلات مافي
و كورونا مدورة؛
و الاعراس و المناسبات و الافراح شغالة؟
و المحيرني اكثر انو اي زول يعمل مناسبة يقول ليك غطت و جيهتني جنس جيهة؛
الحظر شغال
و المواصلات واقفة
و الناس مسافرين؛ يا ربي الناس ديل بمشوا بشنو و بوين؟
كل العالم يعاني من هبوط اسعار البترول و انحنا عندنا اسعار البترول كل يوم في زيادة؛ ممكن تفسروا لي لشنو اسعارنا عكس العالم؟
صحي الامتحانات الاعلونها دي قالوا تكون في الهواء الطلق؟
و كمان بين التلاميذ تكون في مسافة مترين؟
انتو الناس ديل ناسين الخريف و الحر ولا شنو؟
ياخي اصلاح التعليم دا داير له نفس طويل، اول حاجة الطرشمية مدرسة لازم يلموهم؛ و اهم حاجة لازم يلغوا اي شي اسمه التعليم غير الحكومي، ياخي لمن نلقى لي لافتة كبييرة و كاتبين فيها التعليم غير الحكومي بزعل جنس زعل؛ زمان الناس الشطاار بقروا في المدارس الحكومية؛ يييييييييييييك كانت المدرسة عبارة مؤسسة كاملة و متكاملة و عمال مدرسة كادقلي الصناعية زمان اكثر من طلاب بعض المدارس الطرفية اليوم؛ ياخي الطباخين كوووم برئاسة ( سليمان جباي) و الخفراء حد ما عندهم بقيادة ( ابو رخية) و عمال الكهرباء؛ هوي يا ملاح دي مدرسة شنو العندها عمال كهرباء؟
انتو قايلنها زي مدارسكم الهسه ديل؟ ناس تلقاهم قاعدين في ضل شجرة يقولوا ليك ديل تلاميذ!
ياخي مدرستنا دي كانت فيها بابور كهرباء دا لو هسه كانوا بقولوا عليه محطة توليد، و فيها بابور دونكي صهريجه يتوسط فسحة كبيييره مما جعل ضل الصهريج دا مكان للالعاب الشعبية و المصارعة؛ فكنا بنستمتعوا بيها متى ما شئنا؛
تاني حاجة عشان التعليم ينهض لازم نهتموا بالمعلم تدريبا و تهيئة بيئة؛ ففي كثير من المعلمين عينوهم و طلقوهم و خلوهم يتعلموا (الزيانة في روسين الاتامى) ؛ و فيهم من تعلمها و فيهم من لا زال بسك و بلك لليوم؛ و الكلام دا كله جابه راتب المعلم المتدني، حيث ولج مهنة التعليم كل من فشل في الحياة؛ فشفنا الضالع و المكسور و غير المأمون علي القُصّر معلماً، فتولت الذئاب رعي و حماية الضان من الضواري،
في الخرطوم عادي ممكن تكون الامتحانات في اي زمن لان لا توجد بها مدارس قشية ولا ناس بدرسوا في العراء؛ لا نطالب الحكومة الحالية باحداث طفرة في التعليم الان لانها لا تملك عصاء موسى و لكن نطالبها عند اتخاز اي قرار دراسته جيدا مع الاخذ في الاعتبار الاصقاع النائية لان ما ينطبق في الخرطوم لا ينطبق في باقي الولايات.
زيادة راتب المعلم دا بيجعل الوظيفة جاذبة و بترفع مستوى القبول لكليات التربية التي يقبلون لها الان باقل نسب؛ و دا بتيح معلمين شطار في المستقبل، فتطوير التعليم يعني تطوير الدولة؛ و تطوير التعليم لا يتم الا بالرجوع لنظام التعليم الزمان من منهج و معلم و بيئة مدرسية؛ فمن اراد الدنيا عليه بالعلم
و من اراد الاخرى عليه بالعلم؛
و اي محاولة لبناء دولة محترمة بدون تعليم دا زي اصلاح الثورة بثورة أخرى؛ و معروف دا قول حق اريد به باطل؛ لان انحنا الان مارين بمنعطف خطير و اي ثورة ستخرج عن مسارها لان الجيعان ما بحرسوه الاكل؛
نسال الله لي و لكم التوفيق و للوطن المعافاة.
خالص ودي
ملاح محمد بشير الجبوري
ابوزبد