زمان لمن كنا صغااااار بقولوا لينا المنشورة قالت يحننوا الشفع،
مرات بقولوا لينا المنشورة قالت الشفع ما يشربوا شاهي ؛
انا زمان مفتكر المنشورة دي مراة شيخة؛ يعني عينة النسوان العندهن دساتير و بعالجن ديلك؛ انتو الدستور حق النسوان دا سموه على الدستور بتاع الدولة ولا دستور الدولة هو السموه علي دستوار النسوان؟
و علاقة المشابهة شنو بين الدستورين؟
دستور الدولة عبارة عن مجموعة مواد قانونية يعتارف عليها اهل بقعة معينة لتسير شئونهم، هسه يا جماعة دساتير البلد دي كلها ( الدستور الدائم و الدستور المعدل و الدستور المنقح و المسودة الدستورية) في زول شاوركم فيهن؟
و الدستور بتاع الشيخات داك عبارة عن حاجة ما معروفة لا بتنشاف ولا حاجتين؛ و بتدعي المعرفة و الالمام بالغيبيات و بتعالج المرضانين؛ يعني القاسم المشترل بين الدستورين كلهن بعالجن مشاكل الناس؛ و اعتقد دي الخلت الناس تسمى واحد على التاني؛؛ و لكني محتار في جزؤ الباب المثبت في الحيطة داك مسمينه دستور كمان !!! يا ربي دا تابع لدستور النسوان ولا لدستور الدولة؟ و دا ذاته تسميته حديثة لان البناء بالمواد الثابتة انحنا عرفناه قريب دا؛ لكني اعتقد جازما بان دستور الباب دا بكون سموه علي دستور الدولة و المناسبة ان البنا القاعد يبني في بيت غردون دا سمع غردون سال واحد من معاونيه عن الدستور؛ و البنا عجبته الكلمة و طوالي قشر بيها في الطُلب و الشغلانة مشت فيهم،
اها لمن يقولوا لينا المنشورة قالت تتحنوا بنتحننوا و لمن يقولوا لينا المنشورة قالت يخلوا الشاهي بنخلوه و الزمن داك كان لا في تلفونات ولا في واتساب بس بجي زول من ( دندنة) او من ( سِليجم) او من ( ابو كوع) و بقول الكلام دا في السوق و خلاص بيبقى زي التعليمات و الاوامر ينفذ حرفياً؛ لان نسبة الجهل في المجتمع في الوقت داك كانت كبيرة جدا؛ و كانوا الناس ما بحللوا الاخبار ولا بعترضوا الشاذ منها بل بنفذوها بحزافيرها و بعتقدوها كلها صادقة لانهم كانوا صادقين، ياخي يومتى انا في عز نومي و على حسب النومة العميقة اسمع ليك أصوات بعييييدة، صحيت مخلوع لان لا زالت الاحداث الما حلوة ديك لسه عالقة بخيالي؛ ياخي اتاوق ليك بالشباك اشوف الناس ديل طواااال؛ طبعا الصاحي من النوم ما بمييز؛ غايتو عصرت علي روحي و مشيت ليهم؛ بعد ما دعكت عيوني كم مرة القاهم ليك ديل شفعي و شفع اخوي و شفع اختي و امهم؛ واحدين بشربوا في الشاهي و واحدين بصلوا و وحدين بتوضوا؛ سالت اختي يا منال الحاصل شنو؟
قالت لي ضربوا لي و قالوا في شافع اتكلم و قال علاج الكورونا الناس تشرب شاي مُر و تصلي،
قلت ليها يا منولة هسه الساعة كم؟
قالت لي اربعة و شوية صباحاً،
ياخي حسيت الدنيا دي لافة من كثر الافكار الجاتني في راسي؛ ياخي راسي بقى ذي الموبايل الفيه قروبات كثيرة بتاعة واتساب و صاحبه كم يوم ما فتحه و يلقى له شبكة كويسة و يفتحه مش الرسائل دي بتجي كاسرة ذي الزرزور الداقش الدخن؟
يا منال انحنا ناس اهلنا خسروا فينا و علمونا و عشنا عصر الانفتاح معقولة بعد دا نصدقوا خرافات زي دي؟ و مش اي عبادة لغير الله اشراك؟ ، طيب انتو مش مصليين للشافع عشان اتكلم ولا دي مش نيتكم؟
الغريبة لمن الصباح اصبح و مشيت المكتب و السوق لقيت كل الناس شربوا شاي مُر الا انا، و الاغرب لمن خشيت الفيس و الواتس لقيت السودان اغلبه روى شاهي مر، معقول يا ناس دي عقلية ناس عايشين في الالفية الثالثة؟ ياخي الخزعبلات ديل غشونا بيهن زماااااااااااان زمن كان الجهل هو السمة الغالبة بين المجتمع؛ معقول تنغشوا و كمان تنقلوها باحدث الوسائل؟ حقو نعترفوا باننا لسه بعيدين عن العالم لاننا لسه مؤمنين بالمنشورة و الخزعبلات دي؛ كدي عليكم الله الشرب شاهي مُر يرفع يده!!!
نسال الله ان يعيدنا لرشدنا و يهدينا الصراط المستقيم